Аллагьдин ччвурналан Мяргьяматлу, Рягьимлу!

Ваъ! (Узу, Аллагь) ху тувраза гьаму шагьриинди [Меккайиинди]!

Ва увура (я, Пайгъамбар) яшамиш шулава думу шагьриъ.

Ва (ху тувраза Узу) абайиинди, ва дугъан веледариинди (Адамдиинди ва дугъан наслариинди, ясана Ибрагьимдиинди ва дугъан наслариинди, гьацира Исмаилиинди ва Мугьяммаддиинди)!

Учу халкь гъапIунча инсан читинвалиъ.

Яраб дугъу [инсанди] фикир апIурайкIан дарш, чахъди удукьуз шлур фужкIа адар кIури [чав аьзабламиш дарапIди гъитди кIури чан пис ляхнар-карарихъанди]?

КIура дугъу [хътругърайири]: «Узу харж гъапIунза ккудудубкIру девлет (Ислам диндиз къаршу вуйи женгнаъ)!»

Яраб дугъу гьисаб апIурашул гьа, чав шлизкIа гъяркъюндар кIури?

Яраб Учу тувундайкIан дугъаз улар (рябкъбан бадали дугъаз),

ва мелзра ва кIвантIарра (гафар апIбан бадали),

ва (яраб Учу дайкIан) улупдар дугъаз ккудучIвну ккуни кьюбиб жилгъйир? [Яраб Учу улупдайкIан дугъаз ужубна-харжиб жара апIуз, ва улупундайкIан дурарихьна вуйи рякъра]?

Хъа манигъвал ккадапIбанди гъахьундар думу [Гъабхьундар дугъхьан улдучIвуз думу читинваларилан, чанна ва Аллагьдиз мютIюгълувалин арайиъ дийигънайи, дархьиганси эвел апIуз чан нефснанра, ва гъушну хъергну чан файдасуз хияларихъна шейтIнихъ]!

Наънан увуз аьгъю хьидихъа, фу вуш думу дициб манигъвал?

(Манигъвал – думу) лукI деетуб ву (азадвализ)

ясана тIяаьм гьивуб ву гаш йигъан

йитимриз майил-мадатдикан вуйи

ясана хал-йишв хътру касибриз.

Ва дидин кьяляхъ духьну ккунду хъугънайидарикан, сар-сариз сабур тувдарайидарикан ва сар-сариз рягьмат ккун апIурайидарикан.

Гьацдар ву арчул терефнан агьалйир [Женнетагьлийир]!

Хъа хътругъдар Ич аятарихъ [дурар кучIларси гьисаб дапIну], гагул терефнан агьалйир ву [Жегьеннемагьлийир ву],

шлиин хьидиш чарх ккайи ЦIа.