Аллагьдин ччвурналан Мяргьяматлу, Рягьимлу!

(Узу, Аллагь) ху тувраза ахсрариинди,

ва йицIби йишвариинди (зуль-хиджайин вазлин),

ва жут вуйибдиинди ва тек вуйибдиинди,

ва йишвандин мучIушниинди, думу гьяракатнаъ айи вахтна!

Гьаму туврайи хуйир (Аллагьдин) чяаьн дайкIан фагьум-фикир апIруриз?

ГъябхъюндайкIан дарш увуз гьапIнуш яв Первердигари аьдарикан,

Ирамдикан, дестегар (гъусйир) хилиъ ади гъахьи [ягъли дестегар (гъусйир) ккади дараматар диври гъахьи],

ухшар вуйистар дурариз [аьдариз] халкь гъапIундар гьич саб уьлкейиъкьан [жилиин], [Эгер кIуруш дурарин ягълишкан, жанарикан ва кьувватнакан, адайи дурариз барабар вуйидар. КIури шуйи дурари: «Фужар ву учутIан гужлидар?»]

ва самударикан, гъарзар утIукури гъахьи дере вуйиси,

ва Фяряуьндикан, чIвурдар хилиъ ади гъахьи,

зулум апIури гъахьи уьлкйир вуйиси,

ва артухъ апIури душвариъ фасадвал [кяфирвал ва Аллагьдихъ хъпрекърайивал, ва ккитри зулмикк Дугъан лукIар]?

Гъубгъну дурариина Первердигари яв гъюрд аьзабнан [инсаф гъапIундар гьич саризкьан].

Дугъриданра, Первердигар яв – саб вуди, ккеъну а, [лигури гьаммишан вари ляхнарихьинди Чан лукIарин (гюзчивал апIури)].

Хъа инсан, имтигьян апIуз хъюгъю вахтна чав Первердигари чан, хатирлу апIура [гьюрмат айи кас хьуз гъитра] ва неъматнахъди ккацIра, ва думуган кIура дугъу: «Узу хатирлу гъапIну йиз Первердигари!»

Хъа Дугъу [Аллагьди] имтигьян апIуз хъюгъган думу [инсан], хътIабццури [кам апIури] дугъан ризкь, кIура дугъу [чухсагъул адру инсанди]: «Йиз Первердигари узу ужуз гъапIну!»

Хъа ваъ [учву дици кIуну ккундар]! Аькси вуди, учву я йитимрин язухъ апIурадарчва,

я юкIв капIрадарчва (имбударик) уьлин кьацI гьивай к1ури касибвал кайириз,

ва тIараш иливначва ирсниин (аба-баб хътрурин, дишагьлийирин ва зяифкрарин) ипIури думу алархьну [ухди харж апIури],

ва лап ижмиди юкIвра хъивначва девлетнахъ.

Хъа ваъ [учву дици духьну ккундар]! Ппаттар дубхьну дийибгъу вахтна жил дюзенди [Гъиямат Йигъан],

ва гъиди яв Первердигар [Аллагь] (кьазивал апIбан бадали Чан лукIарин) ва (гъиди) малайикарра жерге-жергеди,

ва хиди (хъчюбхюри малайикари) думу йигъан [Гъиямат Йигъан] Жегьеннем – думу йигъан зикир апIуз хъюгъди инсанди (ва хъюгъди ккарагуз, тубайиз хътаркуз), хъа гьаз вуйкIан (сарун) дугъан гьавайиди зикир дапIну? [Дидкан сарун айи хайир адар].

Дугъу пиди (швумалра духьну): «Агь, эгер узу улихь ккимиди йиз уьмрин гъайгъушнаъ гъахьнийиш!»

Ва думу йигъан [Гъиямат йигъан] (гьадму саягъ Аллагьди аьзабламиш апIиди), Дугъхьанси гьич шлихьанкIа аьзабламиш апIуз хьидар [варитIан аьхю аьзаб – думу Аллагьдин аьзаб ву].

ва гьич шлихьанкIа дицистар рукьарихъди йитIуз хьидар, Дугъу йитIруганси. [Кафирар, динсузар, аллагьсузал, бутпересар гьадмусаягъ ижмиди йитIиди зунжрарихъдина рукьарихъди кьюркьяр йивну, гьич шлихьанкIа дурар я удурчуз я дудурчуз хьидар.]

Гьей архаинвал кьисмат гъабхьи нефес!

Хъадабк яв Первердигарихьна [Аллагьдихьна] разиди, ва разивал кьисмат хьп’инди!

Убч|в жергейиъ Йиз (дуруслу) лукIарин.

Убч|в (дурарихъди сабси) Йиз Женнетдиъ.