Аллагьдин ччвурналан Мяргьяматлу, Рягьимлу!

Фтикан гьерхри-хъерхра дурари [меккайин бутпересари] сар-сарихьан?

Аьхю хабрикан [Гъиямат Йигъкан],

фтин гьякьнаан дурари [бутпересари] жюрбежюр фикрар апIури аш.

Хъа ваъ [дици дар, бутпересари тасдикь апIурайиганси], багарихьди дурариз аьгъю хьиди (натижа чпин хътругъувалин)!

Ва сабсан ражну ваъ [дици дар, бутпересари тасдикь апIурайиганси], багарихьди дурариз аьгъю хьиди (натижа чпин хътругъувалин)!

ГъапIундаринхъа Учу жил [дидин зиинишв] дюзенди,

ва дагъларра – ккумарси (жилин зиинишв дирибшвбан бадали),

ва халкь гъапIунча Учу учву (инсанар) жут-жутди [жиларди ва хпарди],

ва гъапIунча Учу ичв нивкI рягьятвалси (эргувал йивбан бадали ичв жанари),

ва гъапIунча Учу йишв либасси (элебкурайи чан мучIушнахъди),

ва гъапIунча Учу йигъ уьмрин (мяишатдин) вахтси,

ва тикмиш гъапIунча Учу ичв зиин ургуд шидадар [ургуд завар],

ва гъапIунча Учу чирагъ ялав алди убгурайи [ригъ] (нур ва манишин туврайи),

ва гьапIунча Учу кючюкьюрайи мархьлин [дифаригъян] шид бегьемди,

адаъбан бадали Учу дидин [думу штун] кюмекниинди удрар ва укIар-кIажар

ва багълар итIикьнайи [кюл-кюлди].

Дугъриданра, Йигъ Фаслин [Гъиямат Йигъ] ву улупнайи вахт [сяаьт].

Уф гъапIу йигъан КIарчназ [Исрафиль малайикди уф апIиди зурба кIарчназ] ва (хъасин) гъидичва учву (вари уч шлу йишвахьна) гъварч-гъварчди.

Ва завра тIапIди ва илтIибкIиди гъапйириз (урчIариз) [аьхючIва урчIар тIаъди, малайикар ктучIвбан бадали]

ва дагъларра хиди гьяракатназ [дурар алийишварилан улдучIвиди] ва (ухшар) хьиди рюкъдиз [хъюгъди рякъюз тузран дифарси].

Дугъриданра, Жегьеннем ву ккебкIнайиб,

ву сяргьятсуз (бутпересарин) хътаркру йишв,

наан гъуздиш дурар аьсрариинди [гьаргандиз],

дадмиш дарапIри душваъ я мичIлишин, я фицибкIа шараб,

убхьурайи шидна кьар ктарди (жегьеннемагьлийирин жанариан удубчIвну гъябгъюрайи),

(ва думу) – (дурар лайикь гъахибдиз) барабар (вуйи) жаза.

Дугъриданра, дурари [хътругъдари] миж кивну гъабхьундар гьяк-гьисабнак (фицики хъугъундайи дурар чIиви апIрувалихъ),

ва гьисаб гъапIну дурари кучIларси Ич аятар [аятар Кьур’андин].

Ва гьарсаб шейъ Учу гьисабназ гъадабгъунча, дибикIну [Аллагьди гъибикIну вари Уьбхюрайи Китабиъ, дидкан аьгъяди хьпан бадали малайикариз].

Дадмиш апIинай [аьзабар Жегьеннемдин], ва (гьич фукIа) Учу артугъ апIруб адарич учвуз, аьзабтIан савайи!

Дугъриданра, ихтият апIури гъахьидариз (аьзабнахьан Аллагьдин) (хьиди) йишв уьрхру (уьрхру жегьеннемдин цIихьан),

(женнетдин) багълар ва тIумтIин ширар,

ва аьхю мухрар кайи гьюруперйир [женнетдин шубар чагълариз дуфнайи],

ва абцIнайи каъса (женнетдин чяхрихъди).

Ерхьидар дурариз душваъ [Женнетдиъ] (я) гьакIи гафар, я кучIал гъапIунва кIуру тахсрар

жаза вуди яв Первердигарихьан – тувнайивал булди –

Первердигари заварин, ва жилин, ва дурарин арайра айибдин, Рягьимлури.

(Думу) йигъан (хьиди) дийигъну Рюгьра [Жабраиль малайикра] ва (имбу) малайикарра жерге-жергеди; анжагъ Рягьимлури (шафааьт) апIуз ихтияр тувдаритIан савайи, гьич шликIа гафар апIури хьидар. Фицики дугъу (чан уьмриъ) гьякь кIури гъахьну.

Думу йигъ [Гъиямат Йигъ] – гьякь ву [улубкьруб ву икибаштIан], хъа ккундарийири (ккудучIвуз думу йигъандин аьзабариккан), ктабгъну чаз рякъ кьяляхъ чан Первердигарихьна вуйи (ужудар ляхнар-карар апIури).

Дугъриданра, Учу вахт улихь хабар дебккунча учвуз (гьей, кяфирар) багахь хьайи азабнакан [аьзабнакан Жегьеннемдин] (хъа багахь хьайиб ву думу, гьаз гъапиш, икибаштIан улубкьруб ву). Думу йигъан, инсандиз гъябкъю вахтна (бикIбариъ), фу гьязур дапIнаш дугъан (кьюбри) хилари, пиди кяфири [хътругъури]: «Агь, эгер узу гъузнийиш (анжагъ) ругси [чIиви дарапIди]!»