Аллагьдин ччвурналан Мяргьяматлу, Рягьимлу!

Яраб гъубшундайкIан дарш, инсан кIурур мялум дарди гъабхьи вахт?

Дугъриданра, Учу халкь гъапIунча инсан литIникан, кибикьнайи (шми), имтигьян апIури думу (ккуркьубси думу яшнакк) (илитIури дугъ’ин фарзар), ва гъапIунча думу (гьаддиз бадали) ебхьрурси (ва) рябкърурси.

Дугъриданра, Учу хъаунча думу [инсан] рякъюъди [улупунча ва гъаврикк ккаунча ужубдинна харжибдин] (хъасин дугъу, чав ктабгъиди рякъ, ва хьиди) ясана шюкюр апIрур, ясана кяфир.

Дугъриданра, Учу гьязур дапIнача кяфирариз зунжрар (хъитIну дурар хъчIюрхбан бадали Жегьеннемдихьна), (хилар, ликар йитIуз кIури) рукьар ва цIа (фтиъ дурар ургури гъуздиш даимлугъ).

Дугъриданра, рябатлуйири [Аллагьдиз мютIюгълуди гъахьидари] убхъури хьиди (Женнетдиъ) (чяхир) каъсайиан, кафурихъди кибикьнайи [варитIан ицци ниъ хъайи].

(Ва удубчIвура думу шараб) булагъдиан, (гунгьарихьан ихтият апIури гъахьи) Аллагьдин лукIари убхъури шлу, ахмиш хьуз гъибтри дидихь (чпиз наанди ккундуш, гьадинди).

Дурари (дюн’яйиъ имбиди) тамам гъапIну туву гаф (мютIюгъ шулча дупну тувуб Аллагьдиз) ва гучIуйи Йигъхьан, фтин писвал вуш тарабгъруб (варидариина, анжагъ Аллагьди хил алдабгъдариина ктарди).

Ва дурари динж гъапIнийи ипIрубдихъди, дилригди (жвуван игьтияжназ) ва дидихьна вуйи ккунивализ, касибра, йитимра ва йисирра:

(Ва кIуйи дурари чпи-чпикди): «Фицики учу динж апIурача учву (учвуз уьлин кьацI гьиврача) [анжагъ] Аллагь бадали [Дугъан разивал бадали] (ва умуд кивну Дугъан ужарайик); ккун апIурадарча учу учвкан я гьякъи, я шюкюр апIуб [тярифар апIуб]!

(Ва апIурача учу думу, фицики) дугъриданра, учуз гучIурчуз ич Первердигарихьан [Аллагьдихьан] мучIу ва къурхуллу йигъандин [Гъиямат Йигъандин].

Ва гъюрхну дурар Аллагьди (дидхьан) писвалихьан думу йигъандин ва тувну дурариз ишигъ ва шадвал.

Ва тувну Дугъу дурариз сабур апIбанди, (женнетдин) багъ ва пекдин парча.

(Дусну) гьачIарккну (дабалгнайишв’ин) дахъру йишв’ин, рябкъидар дурариз душваъ [Женнетдиъ] я ригъ [аьгь апIуз даршлу манишин], я аяз [гьял апIуз даршлу аьхълушин].

Ва (хьиди) багахьди дурарихьна сирин дурарин [женнетдин гьарарин], ва мейва-йимишра вари мютIюгъ апIиди дурариз.

Ва хьиди илдицури дурарилан (жигьил гъаравашар) (марцци) арсран гажнарна гьамглин гъаб-гъажагъ хьади –

гьамглин (дапIнайи) арсракан, деерцнайи (дюз) уьлчмейиинди.

Ва (гьацира) тувди дурариз душваъ [Женнетдиъ] каъсайиан (чяхир), кибикьнайиб зенжефилихъди,

душваъ (айи) «Сальсабиль» кIуру булагъдиан.

Ва хьиди дурарилан илдицури (гъараваш’вал апIури дурарин) даима вуди жигьил гъабанар. (Ва дурар гьацдар вуки), эгер гъяркъиш увуз дурар, (дурарин уччвушнаан) хиял апIарваки, дурар тарагънайи гевгьрар ву.

Ва гъябкъю вахтна увуз (гьар фуну йишв вушра Женнетдиъ), рябкъидивуз душваъ аьхю мулкна ва (гьациб) неъмат (шикиллу апIуз даршлу).

Дурариин (хьиди) чру палтар сундусдиканна ва парчайикан вуйи. Ва (хьиди) дабалгну дурар кулихарихъди арсран (хлихъ хъаъру), ва убхъуз гъитди дурарин Первердигари дурарихь марцци шараб [пиян дарапIру].

(Ва пиди дурариз): «Дугъриданра, му учвуз вуйи гьякъи ву (ичв дин-тIяаьтнахъанди ва ужудар ляхнарихъанди), ва ичв чалишмиш’валарихъанди учвуз аферин мялум апIиди (Аллагьди)!»

Дугъриданра, Учу гьапIунча увуз (я, Пайгъамбар) Кьур’ан пай-пайди [лигну гьарсаб дюшюшдиз].

Сабур апIин адабгъайиз къарар яв Первердигари ва мютIюгъ махьан [гьич шлизкIа] дурарикан [инсанарикан], я гуннагькриз вая кяфириз!

Ва (гьаммишан) мелзниин гъибт ччвур яв Первердигарин [Аллагьдин] [зикир апIури] гвачIнинра, ва хябяхъганра [ригъ ккабхъайиз],

ва йишвнура (абг вахт гъудгнариз); ва апIин сужда [йив йишваъ кIул] улихь Дугъан [Аллагьдин] ва тяриф апIин Дугъан (cуннат-гъудгнар апIури) ярхи йишвди [гьацIишвари]!

Дугъриданра, дурар [бутпересар] юкIв алидар ву аьжалиин [дюн’яйин яшайишдиин] (ва машгъулра духьна дид’ин) ва гъибтра чпин кьяляхъ Гъагъи йигъ [Гъиямат Йигъ].

(Гьаз гъафилди илтIикIурайкIан бутпересар чпин Первердигарихьинди, фицики) Учу халкь гъапIунча дурар ва мюгькам гъапIунча дурарин гьендемар ва дюгьюбар (бакьмакьар), хъа эгер Учуз ккун гъабхьиш, гьюдюхюрча дурар ухшар вуйидарихъди дурариз [дурарин йишв’ина хъади гъюрча жарадар, мютIюгъ вуйидар чпин Первердигариз].

Дугъриданра, му [му Сура] ву зикир, хъа ккунири (мурад-метлебнахъ хъуркьуз дюн’яйиъра ва Аьхиратдиъра), ктабгъиди чан Первердигарихьна вуйи рякъ [хъугъди Дугъахъ ва Дугъаз мютIюгъ хьиди].

Хъа ккун хьидар учвуз (дюз рякъюъди гъягъюз), думу ккун дархьикьан ккагьди Аллагьдиз, – дугъриданра, Аллагь – аьгъюр (гьял Чан лукIарин), (ва) гьякимлур (дурар кIулиъ гъахуз шлур)!

ТIаъра Дугъу Чан рягьматнаъ фуж ккундуш, гьадму (иманлу апIури ва хъасин Женнетдиъ тIаъри), хъа зулумкрариз [дерккнайи сяргьятарилан улдучIвурайидариз] Дугъу гьязур дапIна (Аьхиратдиъ) аьгь апIуз даршлу аьзаб [Жегьеннем].