Аллагьдин ччвурналан Мяргьяматлу, Рягьимлу!

«Гьякь вуйиб» («КкудучIвуз даршлуб») [Гъиямат йигъ]!

Фу ву (думу) дициб «Гьякь вуйиб» («КкудучIвуз даршлуб») [Гъиямат йигъ]?

Хъа увуз аьгъянуз (я, Пайгъамбар), фу вуш (думу) дициб «Гьякь вуйиб» («КкудучIвуз даршлуб») [Гъиямат йигъ]?

Самударира [Салигь пайгъамбрин халкьдира], ва аьдарира [Гьуд пайгъамбрин халкьдира] гьисаб гъапIну кучIалси «Къурхуллу (Йигъ)» [хъугъундар Гъиямат Йигъахъ].

Ва самудар тIанкь гъапIнийи гъирагъдилан гъапIу чIигъну.

Хъа аьдар тIанкь гъапIнийи аязлу кулки (микIлу), гъати.

Дугъу [Аллагьди] тувну дидиз [микIлаз] гьюкум дурарин кIул’ин ургуд йишвандинна ва миржид йигъандин арайиъ хъайи-хъайиси [зат хътадабтIди], ва рякъюравуз увуз душваъ гъирмиш духьнайи адмийир, дутIну дахьнайи нахилин (гьарарин) танарси.

Ва рябкъюрайиб анузхъа увуз фукIа дурарикан имбиди?

Ва апIури гъахьну гунгьар Фяряуьндира, ва думу хьайиз ади гъахьидарира, ва маш кIанакк гъахьидарира [гъулар-хулар, ЛутI пайгъамбри дяъват апIури гъахьи].

Ва хъпехъундар дурар гьаънайирихъ Первердигари чпин (дурарихьна гьаъну гъахьи) [Фяряуьн хъпехъундар Мусайихъ, маш кIанакк гъапIу гъулар-хулар ЛутI пайгъамбрихъ] ва гъидисну Дугъу [Аллагьди] дурар дисбиинди ижмиди [инсафсузди аьзабламиш гъапIну].

Дугъриданра, Учу (кIура Аллагьди), улубчIвуз хъюгъю вахтна шид, хъаунча учву [ичв акьрабар (аьхю абйир-бабар)] шит’ин уьлюбхнайи [гимийиъди],

думу [шид алапIувал] учвуз (гьей, инсанар) зикирси апIбан бадали, ва иб тувну дидихъ хъпехъурайири кIваинди гъибтбан бадали.

Ва уф гъапIу вахтна КIарчназ анжагъ саб ражну, [[Исрафили уф апIиди кIарчназ, хъасин махлукьарин рюгьяр учIвди рякъюъ аьхиримжи вуди гьялназ дуфнайи жанарихьна. Гьарсаб рюгь убчIвди чанди вуйи жандиъ, ва хъасин вари инсанар дийигъиди улихь Первердигарин аьламарин.]]

ва гъахиди (за дапIну) жил ва дагълар, ва илтIикIиди (дурар) биширугдиз [тузраз] сабишв’инди, –

ва думу йигъан улубкьиди Вакьиаь [Гъиямат Йигъ],

ва завра хьибди ппаттар, ва хьибди думу [зав] думу йигъан бушди.

Ва малайикарра (хьиди дийигъну) гъирагъарихъ дидин [завун], ва миржири (аьхю малайикари) гъабхиди Аьрш Первердигарин яв за дапIну чпин кIул’ина.

Думу йигъан [Гъиямат йигъан] хьидичва учву (гьей, инсанар) дерккну (улихь Аллагьдин) (гьисаб-суал дапIну, жазаламиш апIбан бадали), ва гьич сабкьан жиниб гъубзидар (улихь Дугъан) ашкар дархьиди.

Хъа чан (уьмриъ гъапIу ляхнар-карар дидикIнайи) китаб арчул хлиз туврурин гьякьнаан кIуруш, пиди дугъу (шадвалиан): «Магьан учвуз, урхай йиз китаб!

Фицики дугъриданра узу (дюн’яйиин илимбиди) фикир гъапIнийза, йиз гьякь-гьисабнакан».

Ва думу (хьиди) уьмриъ рази вуйи,

ягъли (женнетдин) багъдиъ,

наан хьидиш мейва-йимиш эбхну исди (женнетагьлийирихьна).

(Ва пиди дурариз): «ИпIинай ва убхъай ктабгъури неззет, гъапIубдихъанди учву мукьан ккагьдиз ккудушу йигъари [дюн’яйиин илимбиди]!»

Хъа чан (уьмриъ гъапIу ляхнар дидикIнайи) китаб гагул хлиз туврурин гьякьнаан кIуруш, дугъу (дерднаан) пиди: «Агь, эгер узухьна (затра) тувундайиш йиз китаб!

Ва (гьичра) узуз аьгъю гъабхьундайиш, фициб вуш йиз гьякь-гьисаб!

Агь, эгер му [аьжал] вуйиш аьхиримжиб [гъузруси дидин кьяляхъ чIиви дархьиди]!

Ккадаундар узу (аьзабнаккан Аллагьдин) йиз девлетну.

Гъудубгну узхьан йиз султIанвал [йиз гьюкум] (ва гъузну узу сарди, ужуз духьну)!»

(Ва пиди Аллагьди малайикариз): «Дисай думу ва йитIай (рукьан гъандаларихъди)!

Хъасин Жегьеннемдиъ ургай думу кипну цIа (даимлугъ)!

Хъасин алаай думу зунжриин ургцIур хъуршларин ярхишин али!

Фицики дугъриданра, думу (дюн’яйиъ имбиди) хъугъундар Аллагьдихъ Аьхю,

ва (чавра уьлин кьацI гьивундар) (ва) юкIв капIундар (имбударикра) уьлин кьацI гьивруси касибриз (ипIуз уьлин кьацI адруриз).

Ва адар дугъан [думу хътругърайирин] гъи [Гъиямат йигъан] мушваъ багахьлу (уьрхюз шлур думу аьзабнахьан Аллагьдин),

ва адар тIяаьмра [ипIрубра], чиркинтIан савайи (удубчIвурайи жегьеннемагьлийирин жанариан),

гьич сарикьан ипIури даршлуб, (инкар вуйи) гуннагькраритIан [кяфираритIан] савайи».

Хъа ваъ! [Дар учву кIурайиганси ва фикир апIурайиганси, я, кяфирар] (Узу, Аллагь) ху тувраза учвуз рябкъюрайибдииндира (халкь дапIнайибдикан),

ва учвуз дярябкърайибдииндира!

Дугъриданра, думу [Кьур’ан] — саб вуди, гафар ву (хьади гъюрайи) (Аллагьдихьан) гьаънайири [расули] керимлу (Мугьяммадди ясана Джабраили)!

Ва дурар [гафар Кьур’андин] дар шаирин гафар (учву учвкан кадагъну кIурайи). Пагь, фукьан цIибдитIан учву хъугъраданчвахъа!

Ва дурар [гафар Кьур’андин] дар гафар фахрайин. Пагь, фукьан цIибдитIан учву зикир апIураданчвахъа!

(Думу [Кьур’ан]) – (ву) Дуфнайиб Первердигарихьан аьламарин (Мугьяммад пайгъамбрихьна).

Хъа эгер дугъу [Мугьяммад пайгъамбри] гъапнийиш Учкан [къаршуди Аллагьдиз] фицдаркIа (кучIлин) гафар,

дисуйча Учу думу (Пайгъамбар) арчул хилхъал (ясана дисидийча думу ижмиди),

хъасин кьюб кьатI апIидийча Учу дугъан кIван таб (ва йикIидийи думу),

ва учвкан гьич шлихьанкIа ярхла апIуз хьидайи дугъхьан (Ич аьзаб).

Ва дугъриданра, думу [Кьур’ан] – зикир ихтият апIурайидариз (аьзабнахьан Аллагьдин) [тамам апIури Дугъан амрар ва ярхла шули Дугъу гьярам дапIнайибдихьан]!

Ва фицики дугъриданра, Учуз саб вуди аьгъячуз, (гьей, инсанар) ичв арайиъ [Кьур’ан] кучIалси гьисаб апIурайидарра [кяфирарра] айиб.

Ва, дугъриданра, кяфирариз, думу [хътругърайивал Кьур’андихъ] (Гъиямат йигъан) (илтIибкIиди) бахтсузвализ.

Ва, дугъриданра, думу [Кьур’ан] – якьинтIан гьякь ву.

АпIин тяриф ччвурнан Первердигарин яв Аьхю!