Аллагьдин ччвурналан Мяргьяматлу, Рягьимлу!

Гья мим.

(Му) Китаб [Кьур’ан] гьапIрайиб (Мугьяммад пайгъамбрихьна) (гъюрайиб ву) Аллагьдихьан, Аьхю (ва) Аьгъю,

хил алдабгъурайирихьан гунгьарилан (Чакан ккун апIурайидарин) ва кьабул апIурайирихьан туба (туба апIури Чахьинди илтIикIурайидарин), гужлирихьан аьзабнан гьякьнаан (туба дарапIдариз тувру), туврайирихьан булди (Чаз мютIюгъ вуйидариз). Адар жара первердигар, ГьадмутIан савайи; (ва) Дугъахьна – хътаркувал (Гъиямат Йигъан).

Гьюжатар апIура Аллагьдин аятарин гьякьнаан анжагъ кяфирар гъахьидари (дурар кайидар дар кIури). Ва гъит увуз кIучIал дарапIри (я, Гьаънайир) дурарин илтIикIурайивали уьлкйир вуйибси [фикир мапIан дурар аьзабламиш дарапIди гъитди кIури, фицики дурарин аьхиримжи утагъ – Жегьеннем].

КучIляхярси гьисаб гъапIну [кьабул гъапIундар] (чпин расулар) [мекканлуйирна ва имбу аьрбар] хьайиз улихьна (яшамиш) гъахьи Нюгь (пайгъамбрин) халкьдира ва дурарин кьяляхъ сатIи гъахьидарира (къаршуди чпин пайгъамбрариз) [аьдарира, самударира, ЛутI пайгъамбрин халкьдира ва имбударира]. Ва гьарсаб улматдиз чпин расул [чпихьна гьаънайир] дидисну [йикIуз] ккунди гъабхьну. Ва гьюжатар апIури гъахьну дарари [думу кяфирари] ккабхъуб кIури мяназусди, батIил апIбан бадали дидихъди [кучIлихъди] гьякьикьат. Амма Узу гъидисунза дурар, ва пагь фу саягъ (гужлиб) дайинхъа Йиз аьзаб.

Ва магьан гьамци, чарасуз вуйиб ву [дигиш шлуб дар] кяфирар гъахьидарин гьякьнаан вуйи яв Первердигарин гаф, дурар – жегьеннемагьлийир!

(Рягьимлу Аллагьдин) Аьрш гъабхурайи (малайикари) ва гургутум дидлан [Аьршдилан] илтIикIнайидари, тяриф апIура Первердигарин, гьямд апIури (Дугъаз), ва (кIваантIан) хъугъна Дугъахъ, ва ккун апIура (Аллагьдикан) хъугънайидарин гунгьарилан хил алдабгъуб (кIури): «Первердигар ич, Яв рягьматнаккна ва илмикк Увхьан вари ккауз шулвухьан! Хил алдабгъ сарун туба гъапIдариланна ва Яв рякъюъди гъушдарилан, ва уьрх дурар аьзабнахьан Жегьеннемдин!

Первердигар ич! Ва тIаъ Уву дурар Аьднан кIуру (женнетдин) багълариъ, Уву гаф тувну гъабхьи дурариз ва дурарин абйирикан, дурарин хпарикан ва дурарин насларикан дуруслуйириз (иманагьлийириз). (Фицики) дугъриданра, Уву Аьзизур, Гьякимлур!

Ва уьрх дурар (жазайихьан) дурарин чIуру ляхнарихъанди вуйи [мигьирхан дурарихьан гъапIу гунгьарин гьякьнаан], (фицики) думу йигъан [Гъиямат Йигъан] Уву гъюрхюр чуру ляхнарихъанди вуйи (жазайихьан) [гьидрирхди дугъхьан дурарин гьякьнаан], дицир Яв рягьматнакк ккуркьу мисал ву. Хъа думу [Жегьеннемдин аьзабнаккан ккудучIвну Женнетдиъ учIвуб] мурад-метлебнахъ хъуркьувал (ву) аьхю!»

Дугъриданра, кяфирар гъахьидариз (гъябкъю вахтна Жегьеннем) (дурариз чиб-чпи даккун хьиди. (Ва) илтIикIиди дурарихьинди (малайикар Жегьеннемдин гъаравулвал апIурайи): «Учвуз диндихъна телекелиф дивнушра (гьелелиг жилиин илимбиди), гъузунчва учву кяфирарди, гьелбетта, (думугандин) учвухьна айи даккнишин Аллагьдин гизаф вуйи, (гьамусяаьт) ичв учвухьна айи даккнишинтIан!»

Пиди (кяфирари): «Первердигар ич! ГъапIунва Уву учу кьюб ражари ил алдрударди [бабан гъянаъ литIан вуди гъахьи вахтна ва ич рюгьяр адагъу вахтна, уьмрин аьхир гъафибси], ва чIиви гъапIунва учу кьюб ражари [бабкан хьп’инди ва Гъиямат Йигъан чIиви апIбиинди]. КIул’ин гъидисунча сарун ич гунгьарра. (Жегьеннемдиан) удучIвру йишвахьинди рякъ адайкIан?»

ИлтIикIну ккундайи вахтна (дюаь апIури) (анжагъ) сар Аллагьдихьиди, учву хъугъри гъахьундарчва [Дугъан Сарвал батIил апIури], хъа Дугъак шерикар китIубси, учву хъугъри шуйчва, ари му (аьзаб) учвуз (гьей, кяфирар) гьадихъанди вуйиб ву. Хъа гьюкум (анжагъ) Аллагьдихь хьа, Заанурихь, Аьхюрихь.

Дугъу [Аллагьди] – Чан аятар [кереметар] улупура учвуз (гьей, инсанар), ва гьапIра Дугъу учвуз завариан ризкь (туври акв ва гьаъри мархьар); хъа амма ибак апIурайидар [хайир ктабгъурайидар думу аятарикан] анжагъ (Аллагьдин аятарихьинди) илтIикIурайидартIан дар!

ИлтIикIай Аллагьдихьинди (апIури дюъйир), хъапIри дин (анжагъ) Гьадму бадали, гьятта думу ляхин даккниб вушра кяфирариз [хътругърайидариз].

(Аллагь) (ву) (эйси) заан дережйирин [имбудартIан заан ву Чан дережйириинди], (ва Думу) – эйси Аьршдин. (Ва Дугъан рягьматра Чан лукIарихьна гьациб вуки, Дугъу) гьапIра рюгь [аят] Чан къарарниинди, Чан лукIарикан шлихьна ккундуш, гьадгъахьна [ктагъура дурарикан Чан пайгъамбрар ва гьаънайидар [расулар]], дугъу [Дугъан пайгъамбри] улихьмиди хабар дебккруси (инсанариз) Алахъру Йигъкан [улубкьуз ккайи Гъиямат Йигъкан].

Думу йигъан [Гъиямат Йигъан], удучIву вахтна дурар (накьвариан) (ва дийигъу вахтна дурар улихь чпин Первердигарин), дурарикан вуйиб гьич фукIа жин апIидар Аллагьдихьан [ва гьич сабкьан жиниб гъубзидар ашкар дархьиди]. (Ва Аллагьди пиди): «Шлин (хлиъ а) гъи паччагьвал?» (Гьич шликIа Дугъаз жаваб тувидар). (Хъасин Дугъу пиди): «Сар Аллагьдин, вари ккагърурин!»

Гъи гьарсаб нефеснахьна анжагъ чав гъазанмиш гъапIу ужара рубкьиди, ва гъи зулумра апIидар. Дугъриданра, гьисаб-суалнан гьякьнаан Аллагь хъудуркьну хъайир ву!

Ва назирлу апIин (я, Пайгъамбар) дурар [инсанар] Улубкьуз ккайи Йигъкан [Гъиямат Йигъкан], юкIвар [рюгьяр лукIарин Аллагьдин] (гучI’валиан улихь Дугъан аьзабнан) дюдерикк ккудукьру, (ва) хьидар дурарихьан хътIюбкъюз (айитI гъибтуз) (чпин хъял, гучI’вал ва пашманвал). Адар зулумкрарин [бутпересарин] я багахьлу [я чве-мирас, я дуст] (кюмек апIуз шлур дугъаз), я шафааьтчи...

Аьгъя Дугъаз хаинваликан уларин [лигбан саягъарикан инсандин, лигруган думу гьярам дапIнайибдихьинди], ва (аьгъя) дидканра (ужубдиканра ва харжибдиканра) мухриъ айи.

Ва Аллагьди адагъура къарарар [кьазивал апIура] (инсанарин арайиъ) дугъриди [гьякьлуди], хъа дурари [гьякалжасадари] гьич фукIа апIурайиб адар, дурар [бутпересар] Аллагьдин ерина чпихьинди илтIикIурашра. Дугъриданра, Аллагь – Ебхьурайир, Рябкъюрайир!

Яраб гъилицундайкIан дурар жил вуйиси ва гъябкъюндайкIан дурариз, фициб гъабхьнуш аьхир улихьди (яшамиш) гъахьи (халкьарин)? Вуйи дурар [аьдар ва самудар] дурартIан [мекканлуйиртIан] гужлидар (жандкин) кьувватниинди ва жилиин гъузну имбу лишнариинди [хал-йишв’инди]. Ва гъидисну [аьзабламиш гъапIну] Аллагьди дурар чпин гунгьарин кIуллан. Ва, гьич шликIа дурар гъюрхюндайи Аллагьдихьан [Дугъан аьзабнахьан].

Думу [улубкьуб дурариин] (улубкьуб ву), дурар кяфирар хьпанди [хъугъундар дурар пайгъамбрари хьади гъафи гьякьикьатдихъ], чпихьна гъюри гъахьнушра гьаънайидар ачухъ вуйи аятар хьади.

Ва магьан гьаунча Учу Муса Ич аятар хьади ва рябкъну вуйи султанвал тувну –

Фяряуьндихьна (паччагьдихьна Египетдин), ва Гьамандихьна (Фяряуьндин багахьлуйихьна), ва Кьарундихьна (кьадар адрукьан девлетар хлиъ ади гъахьирихьна). (Хъа амма дурари чпин такабурвалиан кучIалси гьисаб гъапIну Мусайин дяъват, Аллагьди гьаънайирин) ва кIури гъахьну (дугъкан): «(Думу) – сюгьюрчи [фахра] (ва) кучIлях!»

Ва гъафи вахтна думу [Муса пайгъамбар] дурарихьна [Фяряуьндихьна, Гьамандихьна ва Кьарундихьна] гьякь хьади Учхьан [кереметар хьади], дурари (кучIалси гьисаб гъапIну думу кереметар ва) гъапну: «Гьамгъахъди [Муса пайгъамбрихъди] сабси хъугънайидарин баяр йивну йихай, хъа хпар дурарин чIивиди гъитай (дурари хъасин ихь лукIвал ва гьямбалвал апIбан бадали)!» Хъа амма кяфирарин аьмлар рябкъну вуди ургнайидар ву [дурарин аьмлар уларианди гъюрудар ву]!

Ва гъапну Фяряуьнди (гьюрматлуйириз чан): «Гъитай узу, узу Муса йивну йикIурза. Ва гъит дих апIри чан Первердигариз. Дугъриданра, дугъу [Мусайи] ихь дин гьюбюхиди кIури ясана (Египетдин) жилиин фасадвал тарабгъиди кIури гучIуразуз!»

Ва гъапну Муса (пайгъамбри) (Фяряуьндиз ва дугъан гьюрматлуйириз): «Дугъриданра, узу илтIикIунза Первердигарихьинди йиз ва Первердигарихьинди ичв (ккун апIури уьрхювал) гьарсар такабур касдин (писвалихьан) хътругърайи Гьисаб-суал апIру Йигъахъ [Гъиямат Йигъахъ]!»

Ва гъапну чан (иман) (инсанарихьан) жин дапIну гъабхьи, Фяряуьндин насларикан вуйи (сар) муъмин касди: «Дугъу кIура дупну: «Первердигар йиз – Аллагь», учвуз думу (йивну) йикIуз ккунданчвуз? Думу дуфнайир ву учвухьна анжагъ ачухъ вуйи аятар хьади ичв Первердигарихьан. Эгер [Муса] кучIлях вуш, думу кучIал дугъан ликар-хиларигъян гъибиржиди; хъа эгер думу дюз вуш, гъидичв’ина думу (аьзабнан) пай, дугъу учвуз гаф туврайи. Дугъриданра, Аллагьди хъаурдар (дюз рякъюхъна) исраф апIурайидарна [улдучIвури дерккнайи сяргьятарилан] ва кучIлар апIурайидар [гьякьнаан Аллагьдин]!»

Гьей, йиз халкь! Гъи ичв хлиъ а мал-мулк [гьюкум], (ва учву) (Египетдин) жилиин али (имбудартIан) заан вучва. (Рябкъну вуди Аллагьдин аьзабнакк мугучIванай, Дугъан гьаънайир [расул] дукIну). Шли уьрхиди ухьу пис (аьзабнахьан) Аллагьдин, эгер думу гъафиш ухь’ина [улубкьиш ухь’ин]?» Гъапну Фяряуьнди: «Узу улупурайиб учвуз (гьей, инсанар) анжагъ (узуз) рябкъюрайибтIан дариз [рябкъюразуз фтикан хайир аш узузра ва учвузра]; ва учвузра анжагъ дюз рякъюхънатIан дих апIурадарза».

Ва гъапну думу муъмин касди: «Гьей, йиз халкь! Дугъриданра, узуз гучIуразуз (эгер учву Муса йивну гъакIиш) (улубкьур дупну аьзаб) сатIи гъахьи йигъаз ухшар вуйибсиб (къаршуди удучIвну чпин пайгъамбрариз),

ухшар вуйибсиб улубкьубдиз халкьдиин Нюгь (пайгъамбрин), аьдарин ва самударин, ва гьадрарин кьяляхъ гъахьидариин (инкарвалиан хътругъри). Ккунир дар Аллагь лукIар зулмикк ккитуз [гунгьар дарапIдар, дугъу аьзабламиш апIидар]!

Гьей, йиз халкь! Дугъриданра, узуз гучIуразуз учвуз тувру (аьзабнахьан) сар-сарихьинди илтIикIру Йигъандин [Гъиямат Йигъандин],

йигъандин, гьидицуз хъюгъру вахтна учву (гьисаб-суал апIру йишвхьан), гьергуз чара апIури; (ва) (хьидар) Аллагьдин терефнаан учву уьрхрур (аьзабнахьан Дугъан). Хъа Аллагьди дюз рякълан алдаур (ургуз гъитну), гьич шлихьанкIа (дюз рякъ’ин) алауз хьидар!

Ва магьан гъафну учвухьна Юсуф (пайгъамбарра) цIийина (Муса пайгъамбар гъяйиз) ачухъ вуйи аятар хьади (ва амур апIури учвуз ибадат апIинай кIури анжагъ сар Аллагьдиз). Ва (думу чIивиди имбукьан ккахьди) дугъу хьади дуфнайибдин гьякьнаан, гьаммишан шаклуди гъахьунчва, хъа думу гъакIи вахтна (ичв шаклувал ва хътругърайивал имбубтIан артухъ гъабхьиган) учву гъапунчва: «ГьаидайкIан Аллагьди дугъан кьяляхъ хъана гьаънайир [расул]! Гьамци Аллагьди алдаура дюз рякълан [ургуз гъитра] исраф апIурайидарна [улдучIвури сяргьятарилан] (ва) шаклу вуйидар (гьякьнаан Аллагьдин)!

(Му исраф апIурайидарна шаклу вуйидар – дурар) гьюжатар апIурайидар ву чпихьна гъафи аятарин гьякьнаан Аллагьдин (кучIларси гьисаб апIури дурар) гьич саб субуткьан [далилкьан] адарди. Аллагьдинна ва хъугънайидарин даккнишин (дицистар гьюжатарихьна) лап аьхюб ву. (Фици Аллагьди уркънуш юкIвар думу аятарин гьякьнаан гьюжатар апIурайидарин) гьаци убкъди юкIв Аллагьди гьарсар такабурлу зулумкрин!»

Ва гъапну Фяряуьнди (кялхъри Муса пайгъамбрик): «Я Гьаман, дубс узуз [тикмиш апIин] (ягъли) чIвурд, белки узу ккуркьрушул рякъярикк –

рякъярикк заварин – ва лигурза первердигариз [Аллагьдиз] Мусайин. Ва, дугъриданра, узу, саб вуди, фикир апIураза, думу [Муса] кучIлях ву кIури (фицики дугъу узу ктарди сарсан первердигар [Аллагь] а кIура, дугъу Думу завариъ а кIури тасдикь апIура, ва Дугъу Чан расулси гьаъназа кIура)». Ва магьан гьамци (шейтIни) кабалгну Фяряуьндиз писвал чан ляхнарин [фикир апIури гъахьну дугъу дюзуб апIураза кIури], ва ярхла гъапIну думу (дюз) рякъхьан. Ва аьмлар Фяряуьндин анжагъ чан ликар-хиларигъян гъидиржну [дурарикан учв чаз зарал гъабхьну].

Ва гъапну думу муъмин касди (сабсан ражну илтIикIну чан халкьдихьинди): «Гьей, йиз халкь! Гъачай йиз шилнаъди, (ва) узу алаидизачву дюз рякъ’ин!

Гьей, йиз халкь! Фицики му дюн’я – анжагъ саб вахтназтIан вуйи йишв дар; хъа, дугъриданра, Аьхират – гьаргандиз вуйи Утагъ [Ужагъ] ву.

Шли (му дюн’яйиъ) чIуруб апIураш [хъпрекъри Аллагьдихъ], (Аьхиратдиъ) дицириз жаза тувди анжагъ гьаддиз барабар вуйи [гунгьариз гъилигу жаза тувди]. Хъа шли ужуб апIураш [тамам апIури амрар Аллагьдин, ва ярхла шули Дугъу гьярам дапIнайи ляхнарихьан], думу [Аллагьдихъ] хъугърайи жилижви вушра ясана хпишив вушра, дицистар учIвди Женнетдиъ ва гьисаб-суалра дарди ризкьламиш апIиди [кьадар адру] (женнетдин неъматарихъди).

Ва гьей, йиз халкь! Гьаз узу дих апIура учвуз дюаьйихъна [рякъюхъна Аллагьдин ва Дугъан пайгъамбрин], хъа учву дих апIурачва узуз ЦIихьна [кяфирвалихьна, фтин аьхир вуш Жегьеннем]?

Ичв дяъват – узу Аллагьдихъ хътругърайи кяфир хьубна ширк апIуб вуйичв, аьгъювалар узуз дидкан адаршра, хъа узу дих апIураза учвуз Аьзиз (Аллагьдихьна) (ва) Хил алдабгъурайирихьна (туба апIури Чахьинди илтIикIурайидарилан).

Шаклу дарди (ичв инанмиш’валар ва ибадатар), фтихъна учву узуз дих апIураш, – адар дидиъ дяъват [адар дидкан айи хайир] (я) (му) дюн’яйиъра, ва я Аьхиратдиъра, ва (фу дапIнура) ухьу хътаркрудар вухьа Аллагьдихьна, хъа исраф апIурайидар [хътругърайидар ва бутпересар] – дурар Жегьеннемагьлийир (ву)!

(Гъябкъю вахтна аьзаб) учву (хъана) кIваин апIидичва узу учвуз кIурайиб (хъа сарун дидкан учвуз хайир хьидар). Ва (учву узуз ккирчрайи гучIарин гьякьнаан) узу йиз ляхин Аллагьдиина аманат апIураза: дугъриданра, Аллагь лукIар рякъюрайир ву!»

Ва гъюрхну Аллагьди думу [муъмин кас] дурарин аьмларин писвалихьан. Ва улубкьну Фяряуьндин багахьлуйириин пис аьзаб –

ЦIа, фтихь дурар [дурарин рюгьяр] гьиври гьадагъураш гвачIнинра ва хябяхъганра (Гъиямат Йигъ хьайизкьан). Хъа думу йигъан, улубкьу вахтна Сяаьт [Гъиямат Йигъ] (пиди малайикариз [гъаравлариз] Жегьеннемдин): «ТIаай Фяряуьндин багахьлуйир варитIан пис аьзабнаъ!»

Ва магьан дурар а гьюжатар апIури ЦIиъ [Жегьеннемдиъ], ва кIура зяифкрари такабурариз [чпин улихь-кIулихь гъахьидариз]: «Дугъриданра, учу ичв шилнаъди гъягъюрайидар вуйча, ккадаиданчва учу пайнаккан ЦIин (саб ткисибкьан) (думу учв’ина гъадабгъну)?»

Ва пиди такабурари [дурарин улихь-кIулихь гъахьидари]: «(Ваъ, учхьан шулдарчухьан, фицики) – дугъриданра, ухьу вари дидиъ [Жегьеннемдиъ] ахьа. Дугъриданра, Аллагьди сарун гьюкум гъапIну лукIарин арайиъ.

Ва пиди ЦIиъ [Жегьеннемдиъ] айидари, гъаравлариз Жегьеннемдин [малайикариз]: «Дих апIинай ичв Первердигариз, пучIу (апIбан бадали) Дугъу учуз аьзаб сад йигъанкьа».

Пиди дурари [малайикари (гъаравлари) Жегьеннемдин]: «Яраб гъафундайкIан учвухьна ич гьаънайидар ачухъ вуйи аятар хьади (Аллагьдихьан)?» Пиди дурари [жегьеннемагьлийири]: «Ав (гъафнийи)». (Ва) пиди (гъаравлари Жегьеннемдин): «(Дих апIидарча учу ич Первердигариз ва я учвхъанди хъергрура дарча, ари гьадмуган) (учву) дих апIинай (Дугъаз)!» Хъа дих кяфирарин (хьиди) убгну [хьидар дидкан гьич фицибкIа хайир]!

Дугъриданра, Учу чарасуз кюмек апIидича Ич гьаънайидариз ва дурарихъ хъугъдариз, гьаму дюн’яйиъра ва думу йигъанра [Гъиямат Йигъанра] дийигъу вахтна шагьидар [малайикари, пайгъамбрари ва иманагьлийири къаршуди шагьидвал апIуз хъюгъю вахтна улматарин гьякьнаан, Аллагьдин гьаънайидар кучIляхярси гьисаб гъапIу], –

думу йигъан, хайир адру зулумкрариз [кяфирариз] чпин ккарагуваларикан хил алдабгъ кIури. Ва (хьиди) дурариин нянат, ва (гьязур дапIна) дурариз кифир утагъ (ужагъ) [Жегьеннем]!

Ва тувунча Учу Муса (пайгъамбриз) гьидаят ва гъибтунча Китаб [Таврат] ирсси наслариз Исраилин

гьидаятси ва зикирси аькьюл айидариз.

Сабур апIин (я, Гьаънайир)! Дугъриданра, Аллагьди тувнайи гаф (Чан гьаънайидариз кюмек апIидиза кIури) гьякь ву (ва думу дигишра шлуб дар). Ва хил алдабгъ йип (я, Пайгъамбар) яв гунгьилан [Пайгъамбар гуннагькар ву дупну ваъ, анжагъ дугъан ужара артугъ хьпан бадали] ва тяриф апIин Первердигарин яв, гьямд апIури Дугъаз хябяхъганра [мучIушин гъябхьрайи арайиъди] ва гвачIнинра [йигъ алабхьурайи арайиъди]!

Дугъриданра, гьюжатар апIурайидар чпихьна гъафи аятарин гьякьнаан Аллагьдин (дурар батIил апIуз ккунди) (гьич саб) субутра [далилра] адарди, – дурарин мухрариъ [юкIвариъ] анжагъ такабурвал (а). (Ва) дурар [хътругърайидар] хъуркьидар (мурад-метлебнахъ). ИлтIикI Аллагьдихьинди ккун апIури урхювал (дурарин писвалихьан), – дугъриданра, Думу – Ебхьурайир (ва) Рябкъюрайир!

Саб вуди, завар ва жил халкь апIуб заан ву, инсанар халкь апIубтIан, хъа амма инсанарикан хайлиндариз аьгъдар!

Ва (даруганси) барабар дярябкърайирна рябкъюрайир, хъугънайидарра ва дуруслу [ужудар] ляхнар апIурайидарра (барабар дар) чIуруб апIурайидариз. (Пагь фукьан) цIибдитIан аннамиш апIураданчвахъа!

Дугъриданра, Сяаьт [Гъиямат Йигъ] гьелбетта улубкьруб – адар шаклувал дидин гьякьнаан, хъа амма инсанарикан хайлиндар хъугърадар.

Ва гъапну ичв Первердигари [Аллагьди]: «Ккарагай Узуз [илтIикIай Узухьинди дюаь апIури], (ва) Узу учвуз жаваб тувдиза [учву Узкан ккун апIурайиб тувдиза]. Дугъриданра, Узуз апIурайи ибадатниин такабурвал апIурайидар – учIвди дурар Жегьеннемдиъ ужузарси!»

Аллагь – Думу гъапIур ву учвуз йишв, дидин арайиъ учву рягьятвал [эргувал] йивбан бадали, ва (гъапIну) учвуз йигъ, рябкъруси [акуди] (дидин арайиъ учву ичв ляхнар-карар апIруси). Дугъриданра, Алллагь – саб вуди (кьадар адрукьан) фазилат туврур ву инсанариз, хъа амма инсанарикан хайлиндари шюкюр апIурадар (Дугъаз, чпиз туврайибдин гьякьнаан Дугъу)!

Магьан гьамцир ву Думу учвуз – Аллагь, халкь гъапIур гьарсаб шейъ [вари], адар жара первердигар [лайикь вуйир ибадатназ], ДумутIан савайи. Гьаз мукьан учву [гьей, бутпересар] ярхла духьнайкIан (Гьякьикьатдихьан) (Аллагьдин ерина, фтиз вушра ибадат апIури)!

Гьаци [учвуси кучIал гьисаб дапIну Гьякьикьат ва гьидицнайиганси дидхьан, гьей, кьурайшйир], ярхлади а [Гьякьикьатдихьан] Аллагьдин аятар батIил гъапIдарра.

Аллагь – (Думу) учвуз тувур ву жил дуланмиш хьпан бадали, хъа зав – тикмиш гъапIну гъваъси, ва тувну учвуз (гьей, инсанар) (адмидин) юруш, ва гъапIну ичв юрушар варитIан успагьидарди [имбу халкь дапIнайидартIан, инсан уччвур гъапIну], ва тувну учвуз нази-неъматар [гъапIну ичв ризкь гьялал вуйиб, хъа ипIру-убхъруб – ицциб]. Гьамцир ву Думу учвуз – Аллагь, Первердигар ичв!

Думу – ЧIивир, адар первердигар [лайикь вуйир ибадатназ], ГьадмутIан савайи. ИлтIикIай Дугъахьинди (дюаь апIури) (ва ибадат апIинай Дугъаз), апIури (дюаь ва) ибадат анжагъ Гьадгъаз! (Ва) (бютюн) гьямд – (анжагъ Сар) Аллагьдиз, Первердигариз аьламарин (халкь дапIнайикьан)!

Йип (я, Пайгъамбар) (бутпересариз): «Дугъриданра, узуз гьярам дапIна ибадат апIуб думу учву (дюъйир апIури) илтIикIурайи [гьякалжасадариз] Аллагьдин ерина, гъюбхъантина узухьна (сарун) ачухъ вуйи аятар Первердигарихьан йиз; ва (гьацира) узуз буйругъ тувна (хъана) (лап кIваантIан) мютIюгъ йихь кIури Первердигариз аьламарин».

Думу – халкь гъапIур учву [ичв аьхю аба Адам] ругдикан, хъасин – литIникан (майикан), хъасин – далаифдикан. Хъасин адаура Дугъу учву (ичв бабарин гъянариан) нинйирси. Хъасин (Учу гъитрача учву аьхю хьуз), ккуркьбан бадали учву (фикриинди ва жанариинди) дигмиш’валикк. Хъасин (гъитра Дугъу) учвухь ккуркьуз кьабиваликк. Ва ичв арайиъ (гьей, инсанар) а ухди фаракьат шулайидарра [йихурайидарра саб яшнакк ккуркьайиз]. Ва (му рякъяр кккадаурайидар ву) ккуркьбан бадали учву саб флану яшнакк [уьмрин аьхирикк]. Ав, белки учву, аькьвлихъна гъюрийшул!

Думу [Аллагь] – ил алапIурайирра ву ва (дурарин) ил алдабгъурайирра ву, хъа ккундайиган Дугъаз (саб фицибкIа) ляхин апIуз, Дугъу (анжагъ) кIуритIан дар дидиз: «Йибхь» – ва думу (саб дупну) шула.

Дярякъди имбинузхъа увуз (я, Пайгъамбар) дурар (бутпересар) Аллагьдин аятарин гьякьнаан гьюжатар апIурайи [Кьур’ан Аллагьдихьан дуфнайиб дар кIури], пагь фукьан ярхлади адаринхъа дурар (Гьякьикьатдихьан)?

(Дурар) – Китабра [Кьур’анра] ва (Кьур’ан гьапIайиз) Ич Гьаънайидари чпихьна хьади гъафибра кучIал ву кIури гьисаб гъапIдар ву, хъа багарихьди дурариз [думу хътругърайидариз] аьгъю хьиди (аьхир хътругъувалин),

алахьу вахтна (Гъиямат Йигъан) дурарин гарднариин (ялав алди ургурайи) рукьар ва (хьиди йитIну дурарин ликарра) зунжрарихъди хъчIюрхру вахтна дурар (малайикари)

убхьурайи штузди, ва хъасин Жегьеннемдизди, (наан) дурарик кипдиш цIа.

Хъасин пиди дурариз: «Нашди учву шерикарди гьисаб гъапIдар [гьякалжасадар],

Аллагьдин ерина? (Гъит гьадрари учвуз кюмек апIри, эгер шулуш)». (Ва) пиди дурари: «Жин гъахьну дурар учхьан. Ваъ гьадмийганра илтIикIундарча учу дюъйир апIури дурарихьинди (апIури гъахьундарча ибадат дурариз)». Гьамци Аллагьди гъитра ургуз [гъитну кюмек дарди гьидаятнан гьякьнаан] кяфирар [хътругърайидар]!

(Ва пиди дурариз малайикари): «Му (аьзаб) (туврайиб ву) учвуз ихтияр адаршра учву аьлхъюри хьпанди жилиин [шадну тIирхури апIури гъахьи гунгьариин] ва къайд апIури хьпанди машкврар!

УчIвай гъапйириъ [урчIариъ] Жегьеннемдин (ва хьидичва) гъузну душваъ гьаргандиз! Ва пагь фукьан чиркин йишв даринхъа такабурарин утагъ [ужагъ] [жилиин илимбиди Аллагьдин улихь такабурди гъахьидарин]!

Сабур апIин (я, Пайгъамбар) (ва дяъватра яв кIулиз адабгъ)! Дугъриданра, Аллагьди тувнайи гаф гьякьлуб ву! Ва (фици гъабхьишра) улупидича учу увуз (я, Гьаънайир) думу (аьзабнан) пай, дурариз [бутпересариз] (му дюн’яйиъ) гаф тувнайи, ясана фаракьат апIидича уву (думу увуз улупайиз), хъа (фици гъабхьишра) Учухьна хъади гъиди дурар (Гъиямат Йигъан).

Ва магьан гьаунча Учу уву хьайиз улихьна (хайлин) гьаънайидар [расулар] (жюрбежюр халкьарихьна); сякьюдарикан Учу увуз ктибтунча, хъа имбударикан Учу увуз ктибтундарча. Ва (гьич сар) гьаънайирикьан хури гъахьундар (аятар), Аллагьди ихтияр тутрувкьан ккагьди. Ва гъафи вахтна (аьзабнан гьякьнаан вуйи) амур Аллагьдин, дугъривалиинди гьякь апIиди, ва думуган мянасуз хияларихъ хъиргну гъахьидар [кяфирар] заралнаъ ахьди.

Аллагь – (Думу) учвуз гьяйванатар гъапIур [тувур] ву, (сякьюдариин) дурарикан учву элеъну лицбан бадали, хъа (сякьюдарса) дурарикан учву итIурачва.

Ва учвуз дурарикан (жара) манфяаьтра а [хьа, никк]; ва элеъну дурариин рукьбан бадали учву (ярхла йишвариз) лигну игьтияжариз ичв мухрариъ [юкIвариъ] айи, ва учву дурариинра элеури, ва гимйириъра эъри гъягъюри шулчва.

Ва улупура Дугъу учвуз Чан аятар. Хъа фунуб Аллагьдин аятарикан батIил апIуз шулчвухьан?

Яраб гъилицундайкIан дурар жил вуйиси ва гъябкъюндайкIан (дурариз) фициб гъабхьнуш аьхир улихьди (яшамиш) гъахьи (халкьарин)? Вуйи дурар [аьдар ва самудар] дурартIан [мекканлуйиртIан] аьхючIва ва гужлидарра вуйи дурартIан кьувватниинди [хъади гъахьи жанариинди] ва жилиин илимбу лишнариинди [хал-йишв’инди]. Хъа дурари гъазанмиш гъапIубди [кьувватну, хал-йишвну, кьадарну], ккадаундар [гъюрхюндар] дурар (аьзабнахьан Аллагьдин)!

Ва гъафи вахтна думу улматарихьна чпин гьаънайидар [расулар] ачухъ вуйи аятар хьади, шадну тIирхури гъахьну дурар (чпин авамвалиан), (чпихьна гьаънайидари хьади гъафиб батIил апIуз шлубсиб) илим качук кIури. Ва улубкьну дурариин [аьзаб Аллагьдин] чпи кялхъри гъахьибдин кIуллан (ккун апIури гьаънайирикан улубкьри кIури улубкьруб аш ухди).

Ва гъябкъю вахтна дурариз Ич инсафсузвал [гъафи вахтна дурарихьна аьзаб Аллагьдихьан], гъапну дурари: «Хъугъунча учу Аллагьдихъ, (анжагъ) сар (Гьадгъахъ), ва (магьан) (сарун) батIилра гъапIунча Дугъаз шерик вуди тевдарра [гьякалжасадарра]!»

Ва гъабхьундар кюмек дурариз (дициб) диндикан, гъябкъну кIури дурариз Ич кьувват [аьзаб]. Гьатдихъанмина гьациб ву Чан лукIариз дебккнайи суннат Аллагьдин. Ва думуган (гъафи вахтна аьзаб) кяфирар [хътругърайидар] ахьди заралнаъ [дурар гьаммишан заралнаъ айидар ву, амма думу арайиъ дурарин зарал рябкъну вуйиб хьибди]!