Аллагьдин ччвурналан Мяргьяматлу, Рягьимлу!

ТIа син мим.

Мурар [му урхурайидар] – аятар (ву) гъавриъ тIаърайи Китабдин [Кьур’андин].

Белки уву (я, Гьаънайир) гьязурди вушала яв нефес пуч апIуз (пашманвалиан), дурар [яв халкь] шуладар кIури муъминар [иманагьлийир].

Эгер Учуз ккун гъабхьнийиш, гьапIдийча Учу дурариина [кяфирариина] завариан аят [аьхю керемет], ва гарднарра дурарин улихь дидин эрхуйи мютIюгълуди.

Ва гьар фициб цIийи зикир гъафишра дурарихьна [бутпересарихьна] Рягьимлурихьан (Аллагьдихьан), дурар гьидицури шуйи дидхьан (кьабул дарапIри).

Ва сарун дурари (думу бутпересари) кучIалси гьисаб гъапIну (Кьур’ан), хъа фтиин дурар аьлхъюри гъахьнуш, хабар гъиди дурарихьна [аьгъю хьиди дурариз фу китаб вуш думу дициб].

Яраб дурариз [хътругърайидариз] гъябкъюндайкIан жил, фукьан Учу ктучIвуз гъитнуш дид’ин [жилиин] жюрбежюр уччву (ва мянфяаьтлу) (укIар-кIажар) жут-жутди?

Дугъриданра, мидиъ [укIар-кIажар ктучIвбаъ] – саб вуди, аят (улупурайи кьудрат Аллагьдин), хъа гизафстар дурарикан муъминар гъахьундар [Аллагьдихъ хъугъундар]!

Хъа фицики дугъриданра, Первердигар яв, саб вуди, Аьзизур (аьзабламиш ап|увалин гьякьнаан кяфирар) (ва) Рягьимлур (хъугънайидарихьна)!

Ва (кидибт) (я, Мугьяммад) (фици) саб ражари илтIикIнуш яв Первердигар Мусайихьинди: «Гъарах халкьдихьна, зулум апIурайи, –

халкьдихьна Фяряуьндин. Ихтият апIидайкIан дурари (аьзабнахьан Аллагьдин)?»

Гъапну (Мусайи): «Первердигар, дугъриданра, узуз гучIуразуз, дурари узу кучIляхси гьисаб апIур кIури,

ва (дидин гьякьнаан) чIюбкьюр кIури йиз мухур, ва дудрубчур кIури мелз. Гьаъ сарун (Джабраиль малайик) Гьарундихьна (думу йиз кюмекчи хьпан бадали)!

Дурарин узуз аьксина вуди гуннагь а [узу дурарикан сар адми йивну гъакIунза], ва узуз гучIуразуз, дурари узу йивну йикIур кIури».

Гъапну Дугъу [Аллагьди]: «Ваъ (йикIидар)! Гъарахай кьюбридра (Гьарундихъди) Ич аятарра хьади. Дугъриданра, Учу хьидича учвухъди ва хьидича хъпехъури.

Гъарахай кьюбридра Фяряуьндихьна ва йипай дугъаз: «Дугъриданра, учу (учкан гьарсар) расул [гьаънайир] ву Первердигарин аьламарин.

Гьаъ [деет] учухъди баяр Исраилин!»

Гъапну (Фяряуьнди): «Яраб учу дайкIан яв гъайгъу гъизигдар (я, Муса), (уву) бицIи байди имиди учухь хьади гъахьи (вахтна), ва (яраб) уву дайкIан дарш ич арайиъ аьхю-бицIи гъахьир?

Ва уву яв апIруб гъапIунва [дукIну адми], ва уву чухсагъулра пуз аьгърударикан вуна?»

(Мусайи) гъапну (Фяряуьндиз): «Узу думу гъапIуб вуйиз, улдугнайидарихъди хъади гъабхьи вахтари [пайгъамбарди гьаайиз улихьна].

Ва гьергунза узу учвхьан (Мадьяндиз), гучI гъабхьир учвхьан (учву йивну йикIур кIури узу). Ва (хъасин) тувну узуз йиз Первердигари гьюкум [пайгъамбарвал ва илим] ва гъапIну узу мурсаларикан.

Хъа думу неъмат, (я, Фяряуьн) уву узуз тягьнаси йивурайи (йиз гъайгъушнаъ гъахьунча кIури, узу бицIиди айиган), – думу уву Исраилин баяр лукIариз илтIикIбан кIуллан гъабхьиб ву (йивури йихуз хъюгъиган дурарин бицIидар) (ари гьадмуган йиз дада мажбур гъахьну китIнайи узура имбиди шинт ниризди ккатIабхьуз)».

Гъапну Фяряуьнди: «Фу ву думу дициб Первердигар аьламарин?»

(Мусайи) гъапну: «(Узу кIурайи Первердигар аьламарин) – (думу) Первердигар заварин ва жилин ва дурарин арайиъра айибдин, эгер учву аннамиш апIрудар вуш».

Гъапну дугъу [Фяряуьнди] чан багахь хьайидариз [чан гьюрматлуйириз]: «Яраб ебхьурадайкIан учвуз (Мусайи кIурайиб, сарсан первердигар а кIури, узутIан савайи)?»

(Мусайи) гъапну: «(Узу кIурайи Первердигар) – (думу) Первердигар ичв ва Первердигар ичв сарпи абйирин [акьрабарин]».

Гъапну (Фяряуьнди) (гьюрматлуйириз) (кялхъриси): «Дугъриданра, ичв расул, учвухьна гьаънайи, саб вуди, жинар кайир ву!»

(Мусайи) гъапну: «(Узу кIурайи Первердигар) – думу Первердигар ригъ гьудубчIвру ва ригъ ккабхъру терефарин ва дурарин арайиъра айибдин, эгер учву аькьюл айидар вуш».

(Фяряуьнди) гъапну: «Эгер уву (я, Муса) гъадагъиш увуз фужкIа первердигарди, узутIан савайи, гьелбетта дустагъ апIурзаву [зиндандиъ итрузаву]».

(Мусайи) гъапну: «Хъа эгер узу улупиш увуз саб фу-вуш рябкъну вуйиб [субут вуди]?»

(Фяряуьнди) гъапну: «Улуп сарун думу, эгер уву дюз кIурайидарикан [садикьарикан] вуш!»

Ва ккатIабхьну дугъу [Мусайи] чан гьяса, ва магьан, думу (илтIибкIну) рябкъну вуйи [аьхю] битIраз.

Ва ккадабгъну дугъу [Мусайи] чан хил (ккурттиган), ва магьан, думу [хил дугъан] – лизиди рябкъюра (никкси) дидиз лигурайидариз. (Ва кьяляхъ ккибу вахтна дугъу чан хил, думу айи гьялназ гъафнийи.)

(Фяряуьнди) гъапну чан багахь хьайи гьюрматлуйириз: «Дугъриданра, му [Муса] – саб вуди, сюгьюрчи-аьлим (ву),

утIурккуз ккундайи учву ичв жилилан. Фу апIин кIурачва узуз?»

Дурари гъапну: «Мюгьлет тув дугъазна [Мусайизна] ва дугъан чвуччвуз [Гьарундиз] ва гьаъ (Египетдин) шагьрар вуйиси гьяширйир,

хъади гъюбан (бадали) дурари увухьна (я, Фарауьн) айикьан сюгьюрчи-аьлимар».

Ва уч гъапIнийи сюгьюрчйир дебккнайи вахтназ саб мялум вуйи йигъан [лисун хьайиз улихьна безегарин машквар йигъан].

Ва гъапнийи инсанариз: «Уч шуланчва учву (сюгьюрчйирин талитназ Мусайихъди айи)?»

Белки, ухьу сюгьюрчйирихъди гъягъюз хъюгърушул, эгер дурар гъалиб гъахьиш?»

Ва гъафи вахтна сюгьюрчйир, гъапну дурари Фяряуьндиз: «Хьидиянхъа учуз ужара, эгер учу гъалиб гъахьиш?»

(Фяряуьнди) гъапну: «Ав, ва гьаддихъди сабси (йиз) багахьлуйириканра хьидичва (эгер гъалиб гъахьиш)!»

Мусайи гъапну дурариз [сюгьюрчйириз]: «ГатIахьай, учву гатIахьуз (гьязур) дапIнайидар!»

Ва (сюгьюрчйири) гатIахьуру чпин тIурнар ва гьясйир (ва рякъюру дурар инсанариз битIарси). Ва гъапну (сюгьюрчйири): «Ху туврача заанвалиинди Фяряуьндин, икибаштIан, учу гъалиб гъахьунча!»

Ва гатIабхьну Мусайи чан гьяса, (илтIибкIуру думу аьхю битIраз) ва магьан – диди хътIюбкъну, дурари [сюгьюрчйири] кучIал вуди улупуб.

Ва думуган сюгьюрчйири сужда апIуру (улихь кьудратнан Аллагьдин) (фицики дурар гъавриъ ахънийи, гьяса битIраз илтIибкIувал тIилисмиан даруб ва вуйиб думу аьхю кереметарикан).

(Сюгьюрчйири) гъапну: «Хъугъунча учу Первердигарихъ аьламарин –

Первердигарихъ Мусайин ва Гьарундин!»

(Фяряуьнди) гъапну (сюгьюрчйириз): «Гьамгъахъ [Мусайихъ] хъугъуз хъюгъюнчва дарш, сифте узу учвуз (дициб) ихтияр тувайизра? Дугъриданра, думу [Муса], саб вуди, ичв аьхюр, учвуз сюгьюрчивал апIуз улупу. Ва багарихьди учвуз (гьей, сюгьюрчйир) аьгъю хьидичвуз учвуз (мидин гьякьнаан, фициб аьзаб узу учв’ина гьапIдиш)! ХътIурччвидиза узу ичв (я, сюгьюрчйир) хилар ва ликар хачси иливну, хъасин саб вуди, алатIидизачву вари (нахилин танариин)!»

(Туба гъапIу сюгьюрчйири) гъапну (Фяряуьндиз): «Баладар! Дугъриданра, учу хътаркурача ич Первердигарихьна.

Дугъриданра, гизаф ккундачуз, хил алдабгъбну учлан Первердигари ич (вари) ич гунгьарилан, учу сарпидарди муъминар хьпанди (яв халкьдикан).

Ва Учу кIулиъ тIаунча Муса: «УдучIв Йиз (хъугънайи) лукIарра хъади (Египетдиан) йишвну, (ва аьгъяди гъибтай), дугъриданра учвухъ хъачIарккну [хъергну] шлуб (Фяряуьн ва дугъан кьушум)».

Ва (Исраилин баяр рякъюъ учIвуб аьгъю гъабхьи вахтна) гьаъну Фяряуьнди шагьрар вуйиси гьяширйир:

«Дугъриданра, дурар [исраилин баяр] – анжагъ саб бицIи гъварч,

ва дугъриданра дурари учук саб вуди хъял капIну (учхьан гьергбиинди),

ва, дугъриданра ухьу варидари ихтият дапIну ккунду».

Ва адаунча Учу дурар [Фяряуьн ва дугъан кьушум] багълариан, ва булагъариан,

ва хазнийириан, ва керимлу йишв’ан [Египетдиан] (дурар гьюлиъ тIаъбан бадали).

Гьамци (Аллагьди адаъну Фяряуьн чпин уьлкейиан)! Ва тувунча Учу думу [вари девлетар] ирсси наслариз Исраилин.

Ва хъергнийи дурар [Фяряуьн ва дугъан кьушум] дурарихъ (хъуркьнийи) (ригъ) гьудубчIвурайи арайиъди.

Ва гъяркъю вахтна кьюбрид гьяширйир сар-сариз, гъапну асгьябари Мусайин: «Дугъриданра, ухьухъ, саб вуди, хъубкьну (кьушум Фяряуьндин)!»

(Мусайи) гъапну (дурариз): «Ваъ! Дугъриданра, узухъди йиз Первердигар хъа [Дугъу узуз кюмек апIиди], (ва) багарихьди улупиди Дугъу узуз рякъ (ухьу уьрхру)!»

Ва кIулиъ тIаунча Учу Муса: «Йив яв гьяса гьюлилан», – ва ппаттар гъабхьну думу (ачмиш дапIну рякъ кIан’антина), ва вуйи гьарсаб пай (штун), зурба дагъси.

Ва багахь гъапIунча Учу (гьюлихьна) хъасин гьатмундар [Фяряуьн ва дугъан кьушум].

Ва гъюрхюнча Учу Мусара ва дугъахъди хъади гъихьидарра, – вари. [Гьюлин кIан’антина дурар гьатмуну гъирагъдихъинди ктучIвну.]

Хъасин батмиш гъапIунча Учу (гьюлиъ) имбудар [Фяряуьн ва дугъан кьушмар].

Дугъриданра, мидиъ [му тарихдиъ] – саб вуди аят [Аллагьдин кьудрат субут апIурайи], дурар хайлиндар [Фяряуьндихъди хъади гъахьидар] муъминар гъахьундайи [хъугъундайи]!

Ва дугъриданра, Первердигар яв – саб вуди, Аьзизур (аьзабламиш ап|увалин гьякьнаан кяфирар) (ва) Рягьимлур (хъугънайидарихьна)!»

Урх (я, Пайгъамбар) дурариз [бутпересариз] хабар (пайгъамбрикан) Ибрагьим!

Магьан (саб ражари) (Ибрагьимди) гъапну чан адашдиз ва чан халкьдиз: «Фтиз учву ибадат апIурачва?»

Дурари гъапну: «Учу ибадат апIурача гьякалжасадариз ва гьаммишан дурарин гъуллугънаъра ача».

(Ибрагьимди) гъапну: «Яраб ебхьурайкIан дурариз [ичв гьякалжасадариз] учву кIурайиб, учву илтIикIури шлу вахтна дюаьчйирди (дурарихьинди)?

ясана дурари кюмек апIури шулин учвуз (учву дурариз ибадат апIури шлу вахтна) ясана зарал туври шулин учвуз (эгер учву дурарин гъуллугънаъ дархьиди гъузиш)?»

Дурари гъапну: «Ваъ (я кюмекра апIурадар я заралра туврадар)! Учуз гъябкъюнчуз ич абйири гьамци апIури».

(Ибрагьимди) гъапну: «Хъа фикир гъапIунчвахъа, фтиз учву ибадат апIураш,

учву ва ичв акьрабари?

Дугъриданра дурар [ичв гьякалжасадар] – душмнар ву узуз, аьламарин ПервердигартIан савайи,

узу халкь гъапIу, ва (хъасин) алаурайи узу (дюз рякъ’ин),

ва тямин апIурайи узу тIяаьмнахъди [ипIрубдихъди] ва убхърубдихъди,

хъа узу кетIерццу вахтна, Дугъу узухь сагъ хьуз гъитра,

ва узу жансуз (рюгьсуз) апIру (гьаму дюн’яйиъ), ва хъасин чIиви апIру (Гъиямат Йигъан),

ва – миж кивнайир, хил алдабгъбан бадали Дугъу узуз йиз гунгьилан Гъиямат йигъан».

(Ва илтIикIуру Ибрагьим Аллагьдихьинди дюаьчиди): «Первердигар йиз, тув узуз панагьвал [пайгъамбарвал ва илим], ва тIаъ узу дуруслуйирин [салигьярин] жергейиъ,

ва гъибт узкан садикьлу вуйи аваза аьхиримжйирин арайиъ [йиз кьяляхъ яшамиш хьуз имбударин арайиъ]

ва апIин узу ирсси неъматлу (женнетдин) Багъ кьисмат шлударикан,

ва хил алдабгъ йиз адашдиланра, фицики думу ургнайидарикан вуйи,

ва биябурра мапIан узу думу йигъан, дурар чIиви апIру вахтна [Гъиямат Йигъан],

думу йигъан, девлетну ва веледари (гьич шлизкIа) мянфяаьт тутрувру,

Аллагьдихьна дугъри юкIв ади гъафидаритIан савайи!

Ва (апIиди) багахь Женнет ихтият [гучI] гъапIдарихьна (аьзабнахьан Аллагьдин)!

Ва улупиди Жегьеннем гъафилди гъахьидариз [хътругъдариз]!

Ва пиди дурариз [бутпересариз]: «Нашди учву ибадат апIури гъахьидар,

Аллагьдин ерина? Кюмек апIурайинхъа дурари учвуз ясана чиб-чпиз дурари кюмек апIурайин?»

Ва тIаъди [уржди] душваъ [кIанаъ Жегьеннемдин] дурар [хътругъдар] ва улдугну гъахьидар [кяфирарин улихь-кIулихь гъахьидар],

ва (гьацира) кьушумра Иблисдин – вари!

Пиди дурари душваъ [Жегьеннемдиъ], гьюжатар апIури:

«Ху туврача Аллагьдиинди, учу саб вуди рябкъну вуди ургну гъахьунча,

учву барабарди теври гъахьи вахтна аьламарин Первердигарихъди!

Ва алдаъну учу дюз рякълан анжагъ гуннагькрари,

ва адар учуз (гъи) шафааьтчйир,

ва юкIв убгру дуст.

«(Агь) эгер учуз (мумкинвал ккабхънайиш яшамиш хьуз дюн’яйиъ) сабсан ражну, учу муъминар [иманагьлийир] хьидийча!»

Ва, дугъриданра мидиъ [Ибрагьим пайгъамбрин тарихдиъ] – саб вуди, аят, амма гизафсиб пай дурарин (му тарих ебхьурайидарин) шуладар муъминар [иманагьлийир]!

Ва дугъриданра, Первердигар яв — саб вуди, Аьзизур (аьзабламиш ап|увалин гьякьнаан кяфирар), (ва) Рягьимлур (муъминарихьна [иманагьлийирихьна])!

Нюгьдин халкьдира гьаънайидар [мурсалар] гьисаб гъапIну кучIляхярси.

Магьан гъапну дурариз чвуччву дурарин, Нюгьди: «Яраб учву ихтият апIидайкIан (аьзабнахьан Аллагьдин)?»

Дугъриданра, узу – учвухьна ихтибар дапIну гьаънайир.

Ихтият апIинай (аьзабнахьан) Аллагьдин (тамам апIури Дугъан амрар ва ярхла шули Дугъу гьярам дапIнайи ляхнарихьан) ва мютIюгъ йихьай узуз!

Ва узу ккун апIурадарза учвкан дидхъанди [учвухьна рубкьурайи Гьякьикьатдихъанди] ужара: дугъриданра, узузди кIуру ужара анжагъ аьламарин Первердигарихь хьа!

Ихтият апIинай (аьзабнахьан) Аллагьдин ва мютIюгъ йихьай узуз!»

Дурари [Нюгьдин халкьди] гъапну: «Яраб учу хъугъурин увухъ, усал адмийир гъяра кIури увухъди?»

(Нюгь пайгъамбри) гъапну: «Аьгъдарзуз узуз дурари гьапIри гъахьнуш.

Дурарин гьякь-гьисаб анжагъ хьа Первердигарихь йиз, эгер учвуз думу аьгъю гъабхьнийиш!

Ва хътIургидарза узу муъмин кас [иманагьли] (думу фицир вушра).

Фицики узу – анжагъ гъавриъ тIаърайи [улихьмиди хабар дебккрайи] назирчи (инсанарихьна рубкьурайиб анжагъ Аллагьди амур дапIнайибтIан дариз)».

Дурари [Нюгьдин халкьди] гъапну: «Эгер уву дедребккиш (яв дяъват) я, Нюгь, гьелбетта гъвандижвар гъапIдарикан хьидива».

(Нюгь Пайгъамбри) гъапну: «Первердигар! Йиз халкьди узу кучIляхси гьисаб гъапIну [хъугъундар узухъ]!

КкудубкIруб апIин йизна ва дурарин арайиъ аьхиримжиди ва уьрх узура ва узухъди хъайидарра муъминарикан [иманагьлийирикан]!

Ва гъюрхюнча Учу думу [Нюгь пайгъамбар] ва дугъахъди хъайидарра, кьикьдигъди абцIнайи гимийиъ.

Хъасин батмиш гъапIунча Учу (дурар уьхбахъан) гъуздар [хътругъди].

Дугъриданра, мидиъ [му Нюгь пайгъамбрин тарихдиъ] – саб вуди, аят, амма гизафсиб пай дурарин (му тарих ебхьурайидарин) шуладар муъминар [иманагьлийир]!

Ва дугъриданра, Первердигар яв – саб вуди, Аьзизур (аьзабламиш ап|увалин гьякьнаан кяфирар), (ва) Рягьимлур муъминарихьна [хъугънайидарихьна]!

Аьдарира гьаънайидар [мурсалар] гьисаб гъапIну кучIляхярси.

Магьан гъапну дурариз чвуччву дурарин, Гьудди: «Яраб учву ихтият апIидайкIан (аьзабнахьан Аллагьдин)?

Дугъриданра, узу – учвухьна ихтибар дапIну гьаънайир.

Ихтият апIинай (аьзабнахьан) Аллагьдин (тамам апIури Дугъан амрар ва ярхла шули Дугъу гьярам дапIнайи ляхнарихьан) ва мютIюгъ йихьай узуз!

Ва узу ккун апIурадарза учвкан дидхъанди ужара: дугъриданра, узузди кIуру ужара анжагъ аьламарин Первердигарихь хьа!

Яраб учву тикмиш апIуз хъюгъюйкIан гьарсаб ягъли тепейиин лишнарси [зурба дараматар] (фурс апIбан бадали дид’инди), ликрикк ккиври (имбударин ихтиярар)?

Ва тикмиш апIурачва учву гъалйир, – даимлугъ учву гъузруганси (му дюн’яйиъ)!

Хъа (фужкIа) аьзабламиш апIру вахтна учву, аьзабламиш апIурачва зулумкрариси [инсафсузди].

Ихтият апIинай (аьзабнахьан) Аллагьдин (тамам апIури Дугъан амрар ва ярхла шули Дугъу гьярам дапIнайи ляхнарихьан) ва мютIюгъ йихьай узуз!

Ва ихтият апIинай учвуз аьгъювалар кьисмат гъапIурихьанра!

Дугъу тувну учвуз мал-къарара ва баярра,

ва багъларра ва гъярарра.

Дугъриданра, узуз гучIуразуз учвуз вуйи аьзабнахьан аьхю йигъандин».

(Хътругърайидари Гьуддин халкьдикан) гъапну: «Учуз саб вучуз, уву учу назирлу гъапIишра ясана назирлу дарапIишра [улихьмиди хабар дебккишра я дедребккишра] (учу увухъ хъугъурдарча).

Му [учу хъичIихнайидар] – анжагъ аьдатар улихьдин халкьарин,

ва аьзабламишра апIидар учу (уву кIурайиганси, я, Гьуд)».

Ва кучIляхси гьисаб гъапIну дурари думу [Гьуд] (кьабул дарапIди думу пайгъамбарси Аллагьдин), ва тIанкь гъапIунча Учу дурар (гьапIбиинди дурариина мичIли микI). Дугъриданра, мидиъ [му Гьуд пайгъамбрин тарихдиъ] – саб вуди, аят, амма гизафсиб пай дурарин (му тарих ебхьурайидарин) шуладар муъминар [иманагьлийир]!

Ва дугъриданра, Первердигар яв – саб вуди, Аьзизур (аьзабламиш ап|увалин гьякьнаан кяфирар), (ва) Рягьимлур (хъугънайидарихьна)!

Самударира кучIляхярси гьисаб гъапIну гьаънайидар [мурсалар].

Магьан гъапну дурариз чвуччву дурарин, Салигьди: «Яраб учву ихтият апIидайкIан (аьзабнахьан Аллагьдин)?

Дугъриданра, узу – учвухьна ихтибар дапIну гьаънайир.

Ихтият апIинай (аьзабнахьан) Аллагьдин (тамам апIури Дугъан амрар ва ярхла шули Дугъу гьярам дапIнайи ляхнарихьан) ва мютIюгъ йихьай узуз!

Ва узу ккун апIурадарза учвкан дидхъанди [учвухьна рубкьурайи Гьякьикьатдихъанди] ужара: дугъриданра, узузди кIуру ужара анжагъ аьламарин Первердигарихь хьа!

Яраб учву (гьей, самудар) гъитуйкIан гьамушваъ [му дюн’яйин нази-неъматаригъ] хатIасузди (аьзабнахьанна ва аьжалихьан),

багъларигъ, ва булагъаригъ,

дурзнайи хутIларигъ, ва нахиларин гьараригъ, фтин мейва вуш гъюдлиб,

ва утIукураччва учву дагълариъ хулар, фурс апIури.

Ихтият апIинай (аьзабнахьан) Аллагьдин (тамам апIури Дугъан амрар ва ярхла шули Дугъу гьярам дапIнайи ляхнарихьан) ва мютIюгъ йихьай узуз!

Ва мютIюгъ махьанай амрариз [буйругъариз] исраф апIурайидарин [имансузвалихъна ва бутпересвалихъна хъаърайидарин],

фасадвал тарабгъурайидарин жилиин ва фукIа ужу шлуб дарапIри»

(Самудари) гъапну: «Уву (я, Салигь) – анжагъ сюгьрин тIилисмиъ тIаънайидарикан вува (сюгьриан аькьюл мучIу дубхьнайи).

Уву – анжагъ учусир адмитIан дара; аьбкъин сарун аят [субут], эгер уву гьякьлударикан [садикьарикан] вуш».

(Салигь пайгъамбри) гъапну: «Думу – (магьан) хпи деве (учву ккун гъапIубсиб) (ва Аллагьди адапIну думу гъарз’ан); дидира убхъну ккунду, ва учвура убхъну ккунду йигъар мялум дапIну.

Ва мукучанай дидик [аьламатан девдик] пис ният ади, ктрубкIбан бадали учвук аьхю йигъандин аьзаб».

Ва гъубккну дурари думу ва хъасин (гъафну дурарихьна аьзаб) хъюгъну швумал хьуз (дидин гьякьнаан).

Ва улубкьну дурариин аьзаб; Дугъриданра, мидиъ [Салигь пайгъамбрин тарихдиъ] – саб вуди, аят, амма гизафсиб пай дурарин (му тарих ебхьурайидарин) шуладар муъминар [иманагьлийир]!

Ва дугъриданра, Первердигар яв – саб вуди, Аьзизур (аьзабламиш ап|увалин гьякьнаан кяфирар), (ва) Рягьимлур (хъугънайидарихьна)!

ЛутIдин халкьдира кучIляхярси гьисаб гъапIну гьаънайидар [мурсалар].

Магьан гъапну дурариз чвуччву дурарин, ЛутIди: «Яраб учву ихтият апIидайкIан (аьзабнахьан Аллагьдин)?

Дугъриданра, узу – учвухьна ихтибар дапIну гьаънайир.

Ихтият апIинай (аьзабнахьан) Аллагьдин (тамам апIури Дугъан амрар ва ярхла шули Дугъу гьярам дапIнайи ляхнарихьан) ва мютIюгъ йихьай узуз!

Ва узу ккун апIурадарза учвкан дидхъанди ужара: дугъриданра, узузди кIуру ужара анжагъ аьламарин Первердигарихь хьа!

Яраб учвуз дахъуб-гъудужвуб апIуз ккундайкIан жиларихъди вари аьламариан вуйи

гъитну ичв хпар, учвуз ичв Первердигари халкь дапIнайи? Хъа, ваъ! Учву къанун чIур гъапIу халкь вучва!»

Дурари гъапну: «Эгер уву дедребккиш (яв дяъват), я, ЛутI, утIурккдарикан хьидива».

(ЛутI пайгъамбри) гъапну: «Узу – учву апIурайи [аьмал] ляхин даккнидарикан».

(Хъасин ЛутI пайгъамбар илтIикIуру дюаьчиди Аллагьдихьинди): «Первердигар йиз, уьрх узу ва йиз хал-хизан дурари апIурайибдихьан!»

Ва гъюрхюнча Учу думу [ЛутI] ва дугъан хал-хизан — вари,

гъари [ЛутIран хпир] ктарди, (имбур) гъуздарихъди (фицики думу хъугъундайи).

Хъасин тIанкь гъапIунча гьатмундарра

ва гъубгъунча дурариина (завариан) (гъванарин) мархь, ва (фициб) писуб дайинхъа назирлу гъапIдариз [улихьмиди хабар дебккдариз] вуйи мархь!

Дугъриданра, мидиъ [ЛутI пайгъамбрин тарихдиъ] – саб вуди, аят, амма гизафсиб пай дурарин (му тарих ебхьурайидарин) шуладар муъминар [иманагьлийир]!

Ва дугъриданра, Первердигар яв – саб вуди, Аьзизур (аьзабламиш ап|увалин гьякьнаан кяфирар), (ва) Рягьимлур (хъугънайидарихьна)!

КучIляхярси гьисаб гъапIну Аль-Айкаагьлийирира [Шуаьйб пайгъамбрин халкьдира] гьаънайидар [мурсалар].

Магьан гъапну дурариз Шуаьйб (пайгъамбри): «Яраб учву ихтият апIидайкIан (аьзабнахьан Аллагьдин)?

Дугъриданра, узу – учвухьна ихтибар дапIну гьаънайир.

Ихтият апIинай (аьзабнахьан) Аллагьдин (тамам апIури Дугъан амрар ва ярхла шули Дугъу гьярам дапIнайи ляхнарихьан) ва мютIюгъ йихьай узуз!

Ва узу ккун апIурадарза учвкан дидхъанди ужара: дугъриданра, узузди кIуру ужара анжагъ аьламарин Первердигарихь хьа!

Бегьем хьайизкьан ивай терезариъ, ебцуз ккимбиди гъибтрударикан махьанай

Ва ебцай дюз терезарихъди,

ва кам мапIанай инсанариз дурарин шейъ-шюйъ, ва милицанай жилиин, тарабгъури фасадвал.

Ва ихтият апIинай учву ва (ичв) атабабйир халкь гъапIурихьанра».

Гъапну дурари: «Уву (я, Шуаьйб) анжагъ сюгьрин тIилисмиъ тIаънайидарикан вува.

Ва уву (я, Шуаьйб) – анжагъ учусир адмитIан дара, ва учу фикирра апIурача, уву саб вуди кучIляхяриканра ву кIури.

ГьапI уч’ина тики зав’ан (аьзабси), эгер уву гьякьлударикан [садикьарикан] вуш!»

(Шуаьйб пайгъамбри) гъапну (дурариз): «Первердигариз йиз ужуди аьгъя, учву апIурайибдикан».

Ва кучIляхси гьисаб гъапIну дурари думу [Шуаьйб] (кьабул дарапIди гьаънайирси Аллагьдин), ва улубкьну дурариин аьзаб сирин гъапIу йигъан. Дугъриданра, му вуйи аьзаб йигъандин аьхю!

Дугъриданра, мидиъ [Шуаьйб пайгъамбрин тарихдиъ] – саб вуди, аят, амма гизафсиб пай дурарин (му тарих ебхьурайидарин) шуладар муъминар [иманагьлийир]!

Ва дугъриданра, Первердигар яв – саб вуди, Аьзизур (аьзабламиш ап|увалин гьякьнаан кяфирар), (ва) Рягьимлур (хъугънайидарихьна)!

Ва дугъриданра, думу [Кьур’ан] – гьапIнайиб Первердигари аьламарин.

Гъафну (завариан) думу хьади [Кьур’ан хьади] (Аллагьдихьан) Ихтибарлу Рюгь [Джабраиль малайик]

кIваина яв (я, Гьаънайир), уву назирчйирикан [улихьмиди хабар дебккрударикан] хьпан бадали (я, Гьаънайир),

(ва гьапIну Кьур’ан) гъавриъ ахъруси дюзмиш дапIну, аьраб чIалниинди».

Ва дугъриданра дидикан [Кьур’андикан], ктибтура икибаштIан, улихьна гьау бикIбариъра.

Яраб Исраилин насларикан вуйи аьлимариз аьгъювал думу (лишнар аьхиримжи пайгъамбрин), аят [субут] дайкIан дурариз [хътругърайи кьурайшйириз]?

Хъа эгер Учу гьапIнийиш думу [Кьур’ан] шлихьнакIа аьжамарикан,

ва дугъу [аьжамри] гъурхийшра думу [Кьур’ан] дурариз [кьурайшйириз] (марцци аьраб чIалниинди), дурар дидихъ [Кьур’андихъ] (фу дапIнура) хъугъидайи (багьнийир агури).

Гьаци Учу тIапIрача думу [хътругъувал Кьур’андихъ] гуннагькрарин [кяфирарин] юкIвариъ!

Хъугъидар дурар дидихъ [Кьур’андихъ], дярябкъкьан ккагьди аьгь апIуз даршлу аьзаб.

Ва гъиди думу [аьзаб] дурарихьна сабпну, дурари думу гьисскьан дарапIрайи вахтна.

Ва пиди дурари (гъафи вахтна чпихьна аьзаб): «ТувидайкIан учуз мюгьлет (туба апIбан бадали)?»

Яраб гьаз дурари гьялак апIурайкIан Учу аьзабнан гьякьнаан Учхьан вуйи?

Яраб увуз (я, Пайгъамбар) аьгъдайкIан, эгер Учу ихтияр тувиш дурариз неъматар ишлетмиш апIуз хайлин йисари,

ва хъасин гъиди дурарихьна (аьзаб), дурариз гаф тувнайи,

ккадаурдар дурар (аьзабнаккан), дурариз ишлетмиш апIуз тувну гъабхьибди [хьидар хайир уьмрин ярхи йисарикан]?

Ва Учу саб гъулкьан пуч гъапIундарча, гьадраъди имбукьан ккагьди [думу гъулаз] назирчйир (Аллагьдихьан вуйи)

(гъюри гъахьидар) зикир апIури (аьзабнакан ва уьрхру рякъкан). Ва Учу вуди гъахьундарча зулумкрар (аьзабламиш апIрудар улихьмиди хабар деребккди).

Ва гъафундар дугъахьна дидихъди [Кьур’андихъди] (Мугьяммаддихьна) шейтIнар (хътругърайидари кIурайиганси).

Ва хас дар дурариз [дицистар дар шейтIнар] (гьякь рубкьуз шлудар дар), ва шулдар дурарихьан –

фицики дурар [шейтIнар] радд дапIнайидар ву хъпехъувалихьан (Кьур’андихъ завуъ).

Ва мапIан дюаь Аллагьдихъди (сабси) жара первердигаризра, аьзабламиш апIрударикан дархьбан бадали.

Ва назирлу апIин [улихьмиди хабар дебкк] (аьзабнахьан Аллагьдин) яв акьрабариз (майил-мадатдиз).

Ва хъугънайидарикан яв шилнаъди гъюрайидарин улихь ис апIин яв хлицц [гъюдлиди, гиран ктапIуз гьяйифдиси дийигъ].

Хъа эгер дурар хъебрехъиш увухъ (я, Пайгъамбар), йип дурариз: «Дугъриданра, узу шерик дарза учву апIурайибдин!»

Ва тавакъу апIин Аьзизриина, Рягьимлуриина (Аллагьдиина),

уву рякъюрайи, гъудужвури шлу вахтна уву (йишвандин гъудгнариз),

ва фици уву тамам апIураш гъуднин гьяракатар сужда апIурайидарихъди.

Дугъриданра, Думу – Ебхьурайир, Аьгъюр [Дугъаз ебхьура уву урхурайи Кьур’ан ва гафар тяриф апIурайи Аллагьдин ва аьгъя яв ният ва ляхнар-карар.]!

Ктибтузачвузхъа Узу учвуз (гьей, инсанар), шлиина гъюри шулуш шейтIнар?

Гъюри шулу дарар [шейтIнар] гьарсар гунгьариъ утIугънайи кучIляхриина [сюгьюрчийиина (фахрайиина)]!

Дурари [шейтIнари] жиниди хъебехъбиинди чпиз гъеебхьуб (завуъ) ккатIабхьура (сюгьюрчйирихьинди), ва гизафстар дурар [сюгьюрчйир] кучIляхяр ву.

Хъа шаирарин шилнаъди гъягъюра ургнайидар.

Яраб гъябкъюндайкIан увуз [яраб агъдайкIан увуз] (я, Пайгъамбар), дурар [шаирар] чюллер вуйиси лицурайиб [ктагъури жюрбежюр шиърар]

ва дурари [шаирари], дарап1райибра к1ури шлуб?

(Шаирарикан) хъугъдарина ва дуруслу [ужудар] ляхнар-карар гъапIдарина ва Аллагьдиз гизаф зикир гъапIдарина, ва гъюжум ап1бан кьяляхъ (Гьякьлу Имандиина ва Пайгъамбриина), (чпин шиърарихъди) гъюрхдари ктарди. Ва багарихьди аьгъю хьиди зулум апIури гъахьидариз [хътругърайидариз, кучIлар апIури Кьур’андикан ва Пайгъамбрикан], наана чпи хътаркидиш!